Têkoşîn wezîfeyêko tarîxî yo
Tevgerê Şorişê Yewbîyayeyî yê Şaran (HBDH) aşma Gulane ke sey Aşma Şehîdan yena zanayîş de îzehetêko nuştekî da. HBDHyî îzehetê xo de qala muhîmîya aşma Gulane kerda û wina vato: “Ma şexsê Îbrahîm Kaypakkaya û Hakî Karerî de heme şehîdan bi rêzdarî û minet yad kenî. Beyraqa ke ê ma rê verdayî, ma do cayanê tewr berzan de bitepişî.”
Aşma Gulane hetê Tevgerê Azadîya Kurdistanî ra sey Aşma Şehîdan ameya dîyarkerdiş û her serre na aşme de bi mîlyonan kesî şexsê şehîdê na aşme, heme şehîdan vîr anî. Na aşme de şexsîyetê şorişgêrî yê sey Îbrahîm Kaypakkaya, Denîz Gezmîş, Yusuf Aslan, Huseyîn Înan, Hakî Karer û sewbîna resayî şehadet.
Babete ser o Tevgerê Şorişê Yewbîyayeyî yê Şaran (HBDH) zî îzehetêko nuştekî da û şehîdê aşma Gulane vîr ardî. HBDHyî îzehetê xo de va ‘sey her aşme, manaya aşma Gulane zî têkoşîn û xoverdayîşî de zaf muhîm a’ û wina dewam kerdo: “18ê Gulana 1973î de Îbrahîm Kaypakkaya hetê faşîzmê zîndanê Amedî ra û 18ê Gulana 77î de zî Hakî Karer bi hawayo xayînî Dîlok de ame qetilkerdiş.”
HBDHyî îzehetê xo de ca dayo şexsîyetê bînî yê şorişgêrî ke aşma Gulane de şehîd kewtî û ê vîr ardî. HBDHyî îzehetê xo de wina vato: “Reyna aşma Gulane de Halîl Çavgun, Mehmet Karasungur, Îbrahîm Bîlgîn, Armenek Bakirciyan, Ozan Mizgîne, Ferhat Kurtay Mahmut Zengîn, Eşref Anyik, Necmî Oner û sewbîna bi desan kesî na aşme de şehîd kewtî. Ma şexsê Îbrahîm Kaypakkaya û Hakî Karerî de heme şehîdan bi rêzdarî û minet yad kenî. Beyraqa ke ê ma rê verdayî, ma do cayanê tewr berzan de bitepişî.”
Ma înan ra zaf çîyan musayî
HBDHyî îzehetê xo de qala xusûsîyetê şehîdê aşma Gulane kerdî û wina domnayo: “Ê vera bêhêvîtîye de bî û zeyîfî qebul nêkerdî. Vera zeyîfîye de hertim xo newe kerdênê û vera zehmetîyan de hertim vatênê ‘ma do qezenç bikerî’ û wina hereket kerdênê. Ê hertim xo newe kerdênê û wayîrê tarzêko xelqker bî. Ganî ma înan ra bimusî û nê xusûsîyetanê înan hiş û cesaretê xo ser o bineqişnî.
Ganî ma berpirsîyarîya xo bîyarî ca
HBDHyî dewamê îzehetê xo de wina va: “Faşîzm hêriş de sînor nas nêkeno û karker ra heta dewij, kurd ra heta elewî, cinîye ra heta ciwan heme hetî raştê zulmê faşîzmî yeno. Ewro têkoşînê ma prosesanê tewr zehmetinan ra derbaz beno. Ewro vera ma de faşîzmo tewr xidar, dirî û qetilkar esto. Ewro çalakîya tewr şenike ya karker, cinî, ciwan û xebatkaran sey terorîzmî yeno dîyayîş. Vera nêyî Têkoşînê Yewbîyaye xo ferz keno. Seba ke ma bibî cewabê ci ganî ma berpirsîyarîya xo bîyarî ca. Ewro îmkanê girdkerdişê têkoşînê yewbîyaye yê şaran esto û ma do seba nêyî bixebetyî. Têkoşînê Şorişgêrî yê Yewbîyaye do zorê faşîzmî bîşêro û şarê ma do qezenç bikero.” BRUKSEL