Haval Hüseyin Aydın serra 1955'dê, ju dewoa Xozat'ide, Testagı’dê ama dina. Domanina iy zafi Dersım'de veriyê. İy mektebo verın dewa xode u mektebo maben Xozat’dê woand. Peydo şi Estenbol. Lise ucadê woandê.

Woaxte xortiya iydê, her cayê dinadê karkeran, mıletê bındesetan u xoratan vere kapitalizm, emperyalizm u faşizmidê sere xo wodard bi.  Haval Hüseyin ki xortina xodê prodayisê siyasiyi de, hate çepandê caye xo rew ra guret bi. Vere dewletê u zordarandê, cayê iy hatê karkeran u mıletê bındestan bi. O virniye zere koma Kurtulus’ide guriya. Serra 1978’de o bê tay hevalê iy Kurtuluş ra bıryay. İnan koma Tekoşin ard meydan. Zere na komê dê iy, serba Kurdsitano xoser, demokratik u sosyalist zaf dabêpero.

O dırêy kut zından. Cunta 12 Eylül ra tepiya ki ama peguretenê. Polisê Tırkan iy re zaf zulum u heqereti kerdi. O, vere niy zulum dê zaf pet fındet. Hata serra 1985'i zındandê mand. Zındandê bi newes. Dewletê neverda kê sero newesxane. Peydo serkerdi kê mıreno, o zından ra caverda. Caverdayis ra hire asmi tepiya o merd.

Haval Hüseyin, 39 serri raver, 21 Mart 1985’dê, royê xo teslım kerd. Ma o xo vira nekerd. Ma, fikr u comerdiya iy xo vira nekerd. Nay ra tepiya ki ke xo vira nekenime.

Dersimzaza.com / 24 Mart 2024

86 serri ra ravêr, sera 1937 dê, roca 15 Asma Payizapeyine'dê Xarpet'dê, ses serverê Dersım'i, phile aşiran evê pêrsa hukumati u qerarê Atatürk ra erjiay darê. Tayê philê Dersım'i ki, hêps u surgın kerdi. Na rozê, ma sarê Dersim rê roza dê şawa.

Kês, ne hetê hêq-hukuk ra, ne ki hetê vijdan ra besenekeno kê na darestenê ra wayir bıvejiyo. Hukumatê Tırki hona hesave na bıbextinê nedo, hona bınê na thometedêro. Phile Dersim'i a rozê, eve şan- şerefe xo şiay darê ver, qê mınetê nıkerdê, vılê xo nerona. İnu, jê khalkanê xo, serê xo tik guret, riyê qomê ma, verê hometede şa nekerd. İnu no miras Bâbek Hûrremî ra, Hallaci Mansur ra, Pir Sultan ra gurêt, ard Xarpet dê Meydanê Genimi'de, da ma. Serva no miraso kê marê caverdo, inarê mınêtdarime.

Ewro endi aşkêra biyo kê, darestena Seyit Rızay ra ravêr Mustafa Kemal amo Xarpet u Seyit Rızay'de qêsey kerdo. Vato; ''mınetê bıkê darestenera bıxeleşyê''. Seyit Rızay verê na wêstêna Mustafa Kemal'i niya vato:

„Mı evê zur u hilêkariya sıma başnekerd, no mırê bi dêrd. Hama, mı ki verê simadê çokê xo neronay, no ki sımarê bıbo derd.”

Sarê Dersim'i hata nıka, na qêsa Seyit Rızay bêwayir neverdê.

Seyit Rıza, Wusenê Seydi, Cevrayil Ağa, Wusenê Seyit Rızay, Hesene İvrayime Qıci, Aliye Mirzê Silê Hemi u Fındık Ağa, sımarê hurmeta ma esta, sıma verde pay ra vındenime.

Serverê Dersimi, nênê xovirakêrdenê.

14. 11. 2024

Dersimzaza.com